![](http://oia.net/wp-content/uploads/2016/02/17988AD1-D055-4FE3-821C-37DF9F6EA0F2_mw1024_n_s.jpg)
Հունվարի 6-ի Հայ Առաքելական Սուրբ Եկեղեցին նշում է Հիսուս Քրիստոսի Սուրբ Ծննդյան տոնը: Բոլոր եկեղեցիներում առավոտյան մատուցվում է Սուրբ Ծննդյան Պատարագ եւ կատարվում է Ջրօրհնեք:
Սուրբ Ծննդյան տոնակատարությունները սկսվում են հունվարի 5-ի երեկոյան, երբ բոլոր եկեղեցիներում մատուցվում է Ս. Ծննդյան Ճրագալույցի Սուրբ Պատարագ եւ տրվում Սուրբ Ծննդյան Ավետիսը: Ընդունված ավանդույթի համաձայն, Ճրագալույցի պատարագից մարդիկ տուն են վերադառնում` իրենց հետ տանելով եկեղեցում վառած մոմեր, ճրագներ:
Մինչեւ 4-րդ դարը բոլոր քրիստոնյաները Ծննդյան տոնը եւ Մկրտությունը նշում էին հենց հունվարի 6-ին: Բայց 4-րդ դարից սկսած կաթոլիկ եկեղեցին Ծննդյան տոնը նշում է դեկտեմբերի 25-ին, իսկ 5-րդ դարում այս որոշումը վավերացվել է Քաղքեդոնի ժողովի կողմից: Եվ այդ ժամանակներից ի վեր միայն Հայ առաքելական եկեղեցին է, որ շարունակում է հունվարի 6-ին նշել Ծննդյան տոնը: Իսկ Փրկչի մկրտության տոնը, որը խորհրդանշում է Հիսուսի մկրտությունը Հորդանան գետում Հովհաննես Մկրտչի կողմից, կաթոլիկ եկեղեցին էլ շարունակում է նշել հունվարի 6-ին: